BETONG, 11 Nov: Siku lelaki bakal mimit sepengudah kerita ke dibai iya ditinggang tiang telekom ketegal kena sebuah treler ti ngujungka kerita iya labuh ke sepiak jalai.
Penusah bebadi nya nyadi ba Jalai Ulu Paku, Bukit Saban Pagi Tadi.
Balai Bomba enggau Penyelamat (BBP) Betong nerima ripot senentang penusah nya urung pukul 7:14 pagi tadi.
Berebak ari nya, tujuh iku raban Bomba ari BBP Betong digerah ngesah penusah ke nyadi nya ti dituaika Pegawai Bomba Kanan II Edwin Jonani.
Ku Pegawai Operasyen ke mega Pegawai Bomba Kanan I BBP Betong, Henry Jugah madah lebuh sida datai di endur penusah sida tepedaka sebuah kerita saloon Proton saga labuh ba sepiak jalai.
“Lebuh datai ba dia kami tepedaka siku lelaki tepekul ba dalam kerita enda ulih mansutka diri.
“Tudah mujur dipansutka raban Bomba enggau APM nguna perengka ‘Cervical Colar’ laban tudah enda ulih mansutka diri ketegal pedis ba pegu.” ku Henry madah.
Henry madahka, kerita tudah ke benama Era Baer beumur 58 taun ditinggang tiang telekom ke tumbang ketegal kena sebuah treler ke benung ba luan kerita iya.
Nangkan ke nya, tudah ditabanka APM ngunaambulan ngagai Sepital Betong ngambika diperubat.
Raban bomba mega nulung kunteriktor telekom ngalihka tiang telekom ke dipeda ngachau jalai nya dia.
Sepengudah operasyen nyelamat nya tembu, raban bomba bpp betong mulaika diri ke balai.
