KUCHING: Sarawak deka nempa mayuh agi atlit ba dalam lumba Olimpik enggau Paralimpik ari nembiak rebak baru ke ulih nyapai pemujur sereta ngemegahka nama menua ba tikas entarabansa.
Kepala Menteri Datuk Patinggi Abang Johari Tun Openg madahka, juluk nya seriran enggau aspirasyen menua deka nyadika Malaysia sebuah menua ke ngemeratka lumba, lalu ‘Hari Sukan Negara’ siti ari agenda nasional ke mesti deka diteruska ninting taun.
“Kitai deka nempa mayuh agi atlit Olimpik baka Dato Pandelela Rinong enggau Dato’ Muhammad Azizulhasni Awang.
“Kitai sigi bebendar deka nentuka mayuh atlit Paralimpik kitai menang midul emas Lumba paralimpik Jepun 2020 baka Bonnie Bunyau Gustin enggau midul perak Paralimpik Jepun 2020 Jong Yee Khie asal ari nengeri Sarawak,” ku iya madah nengah teks jaku iya ti dibacha Menteri Nembiak enggau Lumba Datuk Seri Abdul Karim Rahman Hamzah beserimbai enggau Pengerami Hari Sukan Negara 2021 Renggat Nengeri Sarawak maya Hari Minggu.
Abang Johari madahka, pemujur atlit ke bulih midul emas enggau perak nya ngemegahka ati rayat Malaysia, lebih agi rayat Sarawak.
“Sarawak udah mujur nempa atlit midul emas Paralimpik Jepun 2020 lalu pemujur tu mesti deka diteruska dikena ngangkatka nama anak Sarawak ke tikas dunya.
“Aku mega deka meri pengaga ati ngagai raban atlit Sarawak ke udah ngayanka pengeransing begulai enggau atlit menua ba Lumba Olimpik Jepun 2020 apin lama ke udah ti nyengkaum Dato Pandelela Rinong ba dalam achara terjun.
“Taja pan enda mujur bulih midul tang pengeransing sereta pemendar iya tetap ngemegahka nama Sarawak,” ku iya madah agi.
Berindik ari nya, iya minta rayat di nengeri tu anang lembau sereta ngambi peluang ngaul diri ba aktiviti lumba ukai semina ketegal deka bepekit ba dalam lumba tang mega ungkup pengerai diri lebuh bejalaika pengidup ninting hari. – TVS
