BETONG: Kaban Kunsil Nengeri (ADUN) Layar, Dato Gerald Rentap Jabu beterima kasih ngagai Tuai Pemegai Menua (TYT) Tun Pehin Sri Abdul Taib Mahmud ke udah meri iya midul Panglima Setia Bintang Sarawak (PSBS) ti mai gelar Datuk.
“Terima kasih mega ngagai Kepala Menteri Datuk Patinggi Abang Johari Tun Openg ke nyadi Chairman Gabungan Parti Sarawak (GPS) enggau raban tuai ba Parti Pesaka Bumiputera Bersatu (PBB) ke suah meri sukung enggau meransang aku bejalaika tanggungpengawa nyadi pengari rayat,” ku iya madah ba dalam siti penerang maya Hari Minggu.
Gerald ke mega Tuai Raban Nembiak PBB mega beterima kasih ngagai sida sebilik, kaban belayan ke udah meri pengaga ati ngagai iya ke udah mujur nerima gelar Datuk.
“Terima kasih ngagai kita semua ke seruran meri sukung, sanding penemu, enggau pengarap ngagai aku bejalaika pengawa ari suba nyentuk ke diatu.
“Pemujur ke dijapai aku tu deka nyadi peransang, pengeransing enggau pengering ngagai aku neruska inspirasyen kitai ngemansangka nengeri Sarawak Ibu Pertiwiku,” ku iya madah agi.
Iya arapka tetiap iku rayat di nengeri tu terus nyaga pengerai, pengelikun diri sereta negutka agi penyerakup seraya sama nuju pemansang dudi hari.
“Aram kitai sama begempung meri servis ke pemadu manah ngagai rayat ungkup pengelantang semua,” ku Gerald madah agi. – TVS
