KUCHING: Atur nagang pemindah enda ulih terus dipejalaika ba Sarawak.
Nengeri tu mesti sedia ngenukuka COVID-19 tu nyadi endemik iya nya kitai deka neruska pengidup begulai enggau virus ke enda ulih dipeda mata kasar tu.
Sapit Kepala Menteri Datuk Amar Douglas Uggah Embas madahka, penyampau kes COVID-19 ba kategori tiga enggau lima semina ngaul siti tauka dua aja diripotka ba nengeri tu.
“Direktor Pengerai Datuk Dr Mohamed Sapian Mohamed lebuh meri licha bisi nerangka senentang baka ni chara kitai deka nyingkang ke renggat endemik.
“Kitai enda ulih terus bejalaika atur nagang pemindah ba nengeri tu. Ba penemu aku, raban dutur enggau saintis mesti belematika chara ti pemadu engkeman dikena mutarka pekara tu,” ku iya madah lebuh dirandau pengarang berita sepengudah ngulu Licha Senentang Gaya COVID-19 di Sarawak maya hari tiga.
Licha nya bisi digulu semua Kaban Kunsil Nengeri di Sarawak.
Kategori satu iya nya pesakit COVID-19 ke nadai ngayanka kelai sakit, kategori 2 sakit enda entu raya, kategori tiga pesakit bisi napi penanggul lempuang enggau begunaka oksigen sereta kategori lima pesakit napi penanggul lempuang sereta begunaka ventilator.
Kelimpah ari nya, Uggah madahka, Sarawak diatu benung napi pengekai varian ti dipeda majak nambah sereta ngirauka ati (VOC) baka varian Delta.
Taja pan pia, berindik ari pemujur program betuchuk vaksin ke udah dipejalaika di nengeri tu mantu ngurangka bekau ke lebih balat agi ngagai pesakit ke dirampit igi penyakit nya.
Uggah ke mega Chairman Komiti Mutarka Penusah Ngenyit Nengeri (JPBN) Sarawak madahka, taka program betuchuk vaksin rayat Sarawak diatu udah ngelui ari 80 peratus.
“Sarawak nengeri ti ngerikodka penyampau peratus betuchuk vaksin ke pemadu tinggi enggau nengeri ti keterubah bejalaika program betuchuk vaksin ungkup nembiak ke beumur 12 nyentuk ke 17 taun,” ku iya madah agi.
