KUCHING , 09 SEPT : Sarawak udah bejalaika pengawa meri tuchuk vaksin COVID-19 ngagai nembiak ti beumur 16 enggau 17 taun berengkah kemari. Pekara tu disambut manah bala pengajar enggau nembiak.
Siku pengajar ti ngajar di Smk St Luke Sri Aman, Banun Ak Gulong madahka iya besetuju enggau atur ari Opis Menteri Pelajar sereta Opis Pengerai ke deka bejalaika pengawa meri tuchuk vaksin ngagai nembiak sekula enggau mega pengajar.
“ Ba runding aku, aku amat besetuju enggau atur ari Opis Menteri Pelajar Malaysia enggau Opis Pengerai ke benung bejalaika pengawa meri tuchuk vaksin ngagai bala pengajar enggau bala nembiak kelebih agi pom 4, 5 enggau 6. Pengawa tu manah bendar laban ulih nyaga pengelikun enggau pengerai pengajar enggau nembiak sekula ke deka nurun besekula ila. Tu mega dikena nyadika ‘dinding’ tubuh sida iya enti nyema sekula berengkah dibuka ila “, ku iya.
“Taja pia, standard atur pengawa (SOP) mega patut dikemeratka bala pengajar enggau nembiak. Tu siti peluang ke chukup manah laban pengajar enggau nembiak ulih belajar betunga mua “, ku iya lebuh dikerandau pengarang berita TVS.
Nangkan ke nya, June Marie Telesai ti beumur 17 taun mega nerima manah pekara tu.
“Atur tu digaga Perintah sereta dikemendarka sida ari Opis Menteri Pengerai ngambika nembiak ke deka nurun besekula ila ulih belajar tauka nurun ke sekula enggau likun, kelimpah ke deka nyapai imuniti beraban di menua kitai “, ku iya.
Kelimpah ari nya, Dr Johnny Pangkas iya nya Direktor Opis Pengerai bagi menua Betong madah apai indai enggau pengibun nembiak diperansang nyukung program meri tuchuk vaksin Covid-19 ngagai nembiak ti beumur 16 nyentuk 17 taun. Tu dikena nyaga pengerai sida sereta dikena nyeliahka penyakit Covid-19 tu ari majak ngekai.
“ Anang irau laban vaksin ke diberi ngagai bala nembiak tu sigi udah dipansik Opis Pengerai Malaysia (KKM) sereta udah bulih pemendar. Pia mega vaksin tu udah diatur sereta dikena sida di menua Amerika tauka ba menua bukai baka di Europe. Nyadi nya ulih dikena sida nembiak ke beumur 16 nyentuk 17 taun ‘, ku iya lebuh dikerandau pengarang berita TVS.
Nambahka nya ku iya, program betuchuk vaksin Covid-19 tu ulih nambahka penyampau rayat di Sarawak ke nerima tuchuk vaksin. Ungkup nembiak ke besekula di luar menua Betong baka di Kuching, tauka ba luar menua Sarawak baka Semenanjung Malaysia enggau Sabah, anang irau laban Palan Pengerai Betong (PKB) endang bisi nyendiaka ‘slot’ ungkup sida tu lalu sida dipinta telefon ngagai palan alai meri tuchuk vaksin ke udah disediaka.
Bagi menua Betong, vaksin deka diberi ngagai nembiak ti beumur 12 nyentuk 17 taun berengkah 10 September 2021. Enggau nya, apai indai enggau pengibun nembiak dipinta datai nganjung anak sida betuchuk vaksin laban sida deka dipinta nyain surat pemendar.
