KUCHING, 11 Nov: Perintah Sarawak ngungkupka agih belanja sepenyampau RM10.9 bilion dikena ngemeratka pemansang kandang menua pesisir di Sarawak.
Premier Sarawak Datuk Patinggi Tan Sri Abang Johari Tun Openg madahka, ari belanja nya, RM6. bilion tauka 62 peratus diungkupka ngagai inisiatif pemansang menua pesisir.
“Kami (perintah Sarawak) deka nentuka rayat menua pesisir ngambi ngasaika asil pemansang sebela enggau pemansang orang di mengeri,” ku iya.
Iya madah munyi nya lebuh mantaika perambu Bajet Nengeri 2025 ba Aum Kunsil Nnegeri (DUN) sehari tu tadi.
Ku Abang Johari, beberapa iniasiatif, program sereta projek deka dipejalaika dikena ngerumban pemansang menua pesisir sekalika ngerapitka seraka infrastruktur.
“Tu nyengkaum Projek Rakyat ti ngungkupka agih belanja sepenyampau RM650 juta, Projek Transformasyen Menua Pesisir (RTP) RM420 juta sereta Program Projek Khas RM265 juta,” ku iya.
Ku terang iya, sepenyampau RM300 juta diungkupka ngagai semilan ejensi pemansang wilayah enggau RM742 juta disediaka ba baruh belanja alternatif dikena nyukung pengawa bejalaika mayuh bengkah program tauka projek.
“Tu nyengkaum projek konsturuksyen jalai, bekal karan enggau bekal ai ti beguna amat dikena nyambungka kandang menua pesisir enggau palan ekonomi.
“Projek tu dikearap ulih meri penguntung ekonomi ke besai ngagai nengeri tu, nempa peluang kereja baru ungkup komuniti lokal sereta meransang penumbuh dalam sektor pengawa konstruksyen enggau servis,” ku iya.
Nangkan ke nya, ku iya madah, urung RM1 bilion deka diungkupka dikena bejalaika sereta nembuka bemacham projek jalai alun enggau jematan.
“Entara projek nya nyengkaum konstruksyen Jalai Batu Kawa, jalai baru ari Ulu Sungai Merah ngagai Jalai Tunku Abdul Rahman, jalai besai ari Pekan Lapok ngagai Gejong Long Teran Batu, Jalai Nanga Ibau, Jalai Serian – Gedong – Samarahan, Jalai Nanga Kesit – Ulu Lemanak – Engkari sereta Jematan Sungai Limbang,” ku Abang Johari.-TVS
