SIBU, 7 Julai: Sarawak diatu udah nyikap diri ngasilka bekau ke meri pemanah dalam industri main video global nengah chara nguna manah pengaya lanting budaya sereta sektor teknologi ti majak ngerembai enggau jampat.
Sapit Menteri Digital Datuk Wilson Ugak Kumbong madahka, Sarawak ngembuan peluang ngempung penemu tradisional enggau inovasyen moden ti beguna amat dikena nempa main video ti ngerinduka ati di serata dunya, seraya ngemeranka budaya asal.
”Konferens tu mandangka komitmen kitai deka nempa komuniti main video ti pemadu tegap di Sarawak.
“Tu mega siti pantar ke alai bakat lokal ulih diansah ngambika ulih besemekih, cherita kitai ulih ditusui sereta pemaju teknologi kitai ulih diayanka ba tikas dunya,” ku iya.
Iya mansutka penemu nya rambau bejadika Konferens Main Video Antarabansa (IGDC) ba Diwan Canselor Tun Abdul Taib Mahmud, Universiti Teknologi Sarawak (UTS) kemari.
Wilson ugak mega nerangka, setipak enggau visyen nya, Gerempung Ekonomi Digital Malaysia (MDEC) ba baruh Opis Menteri Digital nyukung industri main video nengah bemacham program enggau nyendiaka geran.
Tandu iya, tuju meri inisiatif nya dikena nerenak enggau ngansah bakat, bedajaka pemansang main video lokal sereta matak kompeni main video antarabansa meranak puku ba Malaysia.-TVS
