KUALA LUMPUR, 7 Jan: Raban tim Palan Ekonomi Digital (PEDi) enggau Kaunsil Pengari Genturung Pendiau (MPP) deka digerah mantu mensia mayuh ngerijister enggau ngemaruka penerang dalam Sistem Pengkalan Data Besai (PADU).
Menteri Komunikasyen Fahmi Fadzil madah dikena nyapai saran 29 juta rayat Malaysia berejister dalam padu manggai 31 March tu ila, dia kaban parlimen mega deka disaran ngerah raban sida ngemujurka pengawa ngerejister enggau ngemaruka penerang mensia mayuh.
“Aku meda nyangka patut bisi kus mimit tauka latih digaga, diatu timpuh baru seminggu nyadi kitai meda nyangka raban ke pandai IT udah mujur ngisi tang deka nyapai saran manggai 31 March.
“Penyampau ke disebut sebedau tu aku meda kitai patut minta saup PEDi tang Kaban Parlimen Datuk Syed Hussein enggau aku ambika chunto, nyadi kitai patut ngerah raban ba renggat baruh mantu pengawa ngerejister tu (PADU),” ku iya maya dirandau media pengudah ngulu sebengkah pengawa ditu, lebuh Hari Enam.
Lebuh ditanya sekalika perintah deka nyendiaka pom beduduk ari sebana madahka palan PEDi sekut enggau ngenusah raban orang tuai ngerejister nengah tali arus, Fahmi madah pengawa ngerejister nengah pom sigi enda dibuka.
“(Pom) sigi enda…kitai sigi enda ngaga kereja dua kali, kebendar ungkup Wilayah Persekutuan Kuala Lumpur ambika chunto kotai bisi chara nengah MPP, Kaunsil Pengari Genturung Pendiau, enggau ba sekeda endur bukai bisi pelin ke sama.
“Kelimpah ari PEDi kitai mega ulih ngasuh raban bekaul mantu mensia mayuh,” ku terang iya.-TVS
