TATAU, 25 Dis: Siku indu bebadi sepengudah kerita ke ditepan empat diri sebilik belantak enggau sebuah kerita bukai ke datai ari mua ba Jalai Selitut ditu lemai kemari.
Tudah ke bebadi nyawa, Teo Pek Chin, 51 taun, dikenukuka madamka seput ba palan penusah nyadi.
Tuai Balai Bomba enggau Penyah Penusah (BBP) Tatau, Pegawai Bomba Tinggi (PBT II) Jankey Jikat madah, raban sida nerima kangau pasal penusah nya urung pukul 3.45 lemai.
Ku iya, penusah aksiden nya ngaul sebuah kerita Proton Iriz enggau Proton Saga.
“Seninjik raban kami datai ba palan penusah nyadi kami meda semua sida ke bebadi udah disaup mensia mayuh pansut semina siku indu agi ba penuduk sepiak deriba kerita Proton Iriz.
“Tudah dikenuku raban paramediks ari Opis Pengerai Malaysia (KKM) udah madamka seput lalu laki iya ke beumur 52 taun deriba kerita enggau dua iku anak indu seduai ke beumur 12 enggau 18 taun raya bakal,” ku iya.
Ku tandu iya, semua sida ke bakal nyengkaum lelaki ke deriba kerita Proton Saga beumur 48 taun udah dianjung berumban ke Klinik Pengerai Tatau ngambika diperubat.
“Raban Operasyen Pemansut semina nyaup mansutka tudah indu ke udah midang ngena pantar enggau udah nya diserah ngagai raban polis ungkup atur ke bekaul,” ku iya.
Nitihka penerang, Teo asal ari Sibu begulai enggau sida sebilik dalam rantau jalai deka pulai ke Sibu sepengudah kemisi ba bintulu.
Nangkan ke nya, Tuai Polis Pelilih Tatau, Deputi Superintendan (DSP) Jame Reis maya dirandau ngenuku sida amat bisi nerima siti ripot bekaul enggau penusah nya.
Kes dipansik nitihka Seksyen 41(1) Akta Pengangkutan Jalan (APJ) 1987. -TVS
