KUCHING, 15 Dis: Penumbuh Opis Menteri Ubah Kuasa enggau Utiliti Mensia Mayuh endang nemban sereta senutuk enggau kuing tuju Sarawak ti benung nyerungkai sereta ngemansangka kuasa gadung enggau kuasa ulih dikemaru.
Sapit Tuai Direktor (Strategik enggau Teknikal) Opis Meteorologi Malaysia, Ambun Dindang madahka pengawa nyiri Sapit Menteri Besai Datuk Seri Fadillah Yusof nyadi menteri ti nguasa opis menteri baru nya dikearapka mantu Sarawak enggau menua tu lebih chakah agi ngemansangka kuasa gadung ungkup pengelantang pengidup dudi hari.
“Nyadi penumbuh opis menteri tu sigi engkeman sereta patut diberi ngagai pengari kitai ari Sarawak.
“Enti nitihka ripot ari Panel Antara Perintah pasal Ubah Klimet (IPCC), 34 peratus gis rumah gadung diasilka ari sektor kuasa, sektor industri (24 peratus), sektor betanam betupi (22 peratus), enggau sektor pengangkut (15 peratus). Sektor kuasa antara sektor ti mayuh mansutka gis rumah gadung ngagai angin,” ku iya madah rambau ditelefon pemberita TVS lebuh Hari Empat.
Kelimpah ari nya, Ambun nerangka pemisi opis menteri baru nya mega ulih beratika silik enggau ngiga chara ke pemadu manah dikena mutarka enggau ngurangka pemansut gis rumah gadung ngagai atmosfera ti tau ngangatka dunya.
“Semua nemu pasal perintah Sarawak ba baruh iring Premier Sarawak Datuk Patinggi Tan Sri Abang Johari Tun Openg diatu ngemeratka pengawa ngasilka kuasa beresi enggau ulih dikemaru baka hidrogen, solar, angin, lukut sereta kuasa ari hidroelekterik,” tandu iya.
Sebedau tu, Abang Johari lebuh meri timbal senentang Menteri Besai Datuk Seri Anwar Ibrahim ke nyiri Fadillah nyadi Menteri Ubah Kuasa enggau Utiliti Mensia Mayuh siti pemutus ke nemban.
Ku iya madah, udah tu ila sigi patut Fadillah nyerariska Pelasar Kuasa Menua dikena nentuka Malaysia mujur nyadi hab gadung di rantau tu. – TVS
