KUALA LUMPUR, 21 Nov: Chairman Pakatan Harapan (PH), Datuk Seri Anwar Ibrahim madah diri sedia bekerejasama enggau gempung politik ari Borneo iya nya Sabah enggau Sarawak.
“Udah tentu. Kitai sigi enda ngelaungka sapa-sapa,” ku iya.
Iya mansutka pekara nya maya dirandau pemberita pengudah berandau enggau raban Barisan Nasional (BN) bekaul enggau pengawa numbuhka Perintah Besai, sehari tu tadi.
Kenu ku Anwar tuju sida berandau laban deka nentuka sebuah perintah ke tegap enggau nyerangkung semua nyengkaum berandauka sentang pekara ekonomi.
Taja pia, iya madah BN ti betuaika Chairman iya, Datuk Seri Dr Ahmad Zahid Hamidi agi bedau ngaga pemutus sekalika meri sukung ngagai PH tauka enda.
“Randau lebih nyaran ngagai isu polisi enggau peminta ke patut digaga dalam perintah baru dikena numbuhka perintah ke tegap enggau nyerangkung semua,” ku iya. -TVS
