KUCHING, 11 Nov: Sektor dagang temuai di nengeri tu diungkup agih sepenyampau RM174 juta nengah Opis Menteri Dagang Temuai, Industri Kreatif enggau Seni Pemerindang dikena ngemujurka pengawa operasyen, makit enggau ngelakuka aktiviti dagang temuai.
Premier Sarawak Datuk Patinggi Tan Sri Abang Johari Tun Openg madah program ngemakitka enggau ngelakuka dagang temuai nyengkaum pengawa bejalaika achara sekalika festival ti ngemeratka penyelai budaya Sarawak.
Berebak enggau nya ku iya madah perintah Sarawak mega nyendiaka geran ngagai Kaunsil Dagang Temuai Sarawak, Business Events Sarawak, Majlis Seni Sarawak enggau Kaunsil Krafjari Sarawak.
Ba awakka sama ku iya madah, geran melanja enggau geran pansik mega diberi ungkup aktiviti dagang temuai.
“Sektor dagang temuai chukup beguna dikena nyungkak ekonomi kitai ke alai tu siti ari pekara ti ulih mantu dalam pemansang ekonomi nengeri.
“Nengah strategi ti dikemeratka, kitai deka Sarawak nyadi palan ti dipilih ungkup ekodagang temuai ti ngembuan mayuh budaya sereta kaya enggau lanting bansa ke nyelai.
“Ba taun 2025, kitai deka nambahka inisiatif dalam sekeda bidang dikena matak mayuh agi temuai enggau nyendiaka mayuh aktiviti ti ulih ngerinduka ati dalam sektor dagang temuai Sarawak,” ku iya madah.
Abang Johari munyi nya maya mantaika perambu Bajet Sarawak 2025 ba Aum Kunsil Nengeri (DUN) pagi tadi.
Nangkan ke nya Abang Johari madahka inisiatif ngemakit nguna chara digital mega deka terus dikerembai enggau meri fokus ba kerejasama enggau ejensi dagang temuai dalam tali arus enggau serikat penerebai dikena nambahka pengulih lebih agi ba makit besai di Eropah, ASEAN enggau Ocenia.
“Enggau nambahka kaul sechara strategik, kitai naga ulih matak lima juta iku temuai rambau ujung taun 2025,” ku iya.
Kelimpah ari nya ku iya madah, penyampau RM81 juta disediaka dikena bejalaika projek dagang temuai baka Palan Seni Pemerindang, transformasyen Brooke Dockyard ngagai Muzium Warisan Industri, Pelancongan Bakau Sadong Jaya, Kampus Muzium Sarawak enggau laluan warisan, Taman Arkeologi Santubong enggau Pusat Wallace, pemulihan enggau penambah begunan sereta pemansang Muzium Warisan Islam enggau Muzium Warisan Melayu Darul Hana.
Ungkup pemansang palan pematak ekodagang temuai ku iya madah, Sarawak Forestry Corporation (SFC) terus ngiring ngembing dagang temuai bepelasarka pengawa ngenan enggau nempa peneleba ngaul temuai ti ngemeratka pemeruan enggau ngenan lanting seraya nambahka penguat komuniti lokal.
“Enggau inisiatif besai ke bukai ti benung chakah diatur baka ngelakuka Taman Negara Niah nyadi Palan Lanting Dunya UNESCO sereta ngerembaika latih ungkup orang deriba ungkup temuai.
“SFC deka ngempung sereta meri pemereti ati senentang biodiversiti enggau kaya dalam peneleba budaya seraya nyadika Sarawak nyadi pemungkal dalam ekodagang temuai serantau,” tandu iya. – TVS
