KUCHING, 11 Nov: Perintah Sarawak nyendiaka belanja sepenyampau RM30.7 juta dikena ngaga sereta ngangkatmanah fasiliti lumba ba selampur Sarawak ba taun 2025.
Premier Sarawak Datuk Patinggi Tan Sri Abang Johari Tun Openg madahka tu dikena nentuka tetiap fasiliti ulih nangkup peminta betikas antarabansa.
“Ba taun tu perintah Sarawak udah ngemendarka ungkup penyampau RM76.4 juta dikena ngaga enggau ngangkatmanah fasiliti umba ba selampur nengeri.
“Lalu RM250 juta mega diungkupka nengah Projek Rayat dikena ngemansangka kompleks lumba baru sereta ngangkatmanah dewan suarah ke udah bisi,” ku iya.
Abang Johari mansutka penerang nya maya perambu Bajet Sarawak 2025 ba Aum Kunsil Nengeri (DUN) pagi tadi.
Berebak enggau nya ku iya madah, ungkup penyampau RM6.1 juta disediaka dikena ngatur mayuh bengkah achara lumba.
Iya madahka geran nya mega ngaul bantu ungkup raban atlit enggau kelab lumba enggau main.
“Lalu penyampau RM2 juta mega diungkupka dikena ngatur mayuh bengkah program bekaul enggau pengawa dagang dalam raban nembiak Sarawak,” ku iya. – TVS
