KUCHING, 11 Nov: Perintah Sarawak nambahka agi belanja sepenyampau RM2.2 bilion tauka 16 peratus dikena ngatur sereta ngemujurka pemansang nengah Bajet Sarawak 2025, iya nya ari RM13.6 bilion ba taun 2024 ngagai RM15.8 bilion.
Premier Sarawak Datuk Patinggi Tan Sri Abang Johari Tun Openg madahka agih belanja ti berambaika jaku ‘Bersama Membina Masa Depan Yang Makmur’ nya nyadi pugu ngaga strategi fiskal Perintah Sarawak lalu tu ngayanka komitmen tegap ungkup rayat.
“Agih belanja tu dipelin ungkup Sarawak ti inklusif ke pemaik ke alai tetiap rayat bulih akses ke sama ungkup peluang enggau nyungkak penatai pemisi.
“Tu (agih belanja) udah ditisih enggau manah dikena nentuka nengeri kitai ulih besemekih, sereta ulih negapka diri ba renggat global,” ku iya.
Abang Johari mansutka penerang nya maya mantaika perambu Bajet Sarawak 2025 ba Aum Kunsil Nengeri (DUN) sehari tu.
Berebak enggau nya ku iya, Bajet Sarawak 2025 ngemaruka enggau ngayanka komitmen perintah Sarawak dalam ngintu manah pengelantang rayat nengah pelasar dikena ngurangka tating belanja raban ti ngembuan penatai pemisi ke baruh enggau sedang kelimpah terus bejalaika program ti ngemeratka rayat.
“Bajet 2025 nya dilangkar nengah lapan pugu strategik baka ngubah enggau ngemayuhka ekonomi Sarawak, ngujungka Sarawak nyadi palan alai beranakka puku enggau ngelakuka pemansang PKS sereta negapka pemansang bakat enggau pelajar.
“Pugu bukai ngaul ngerumban transformasyen digital enggau inovasyen, nambahka pengelantang rayat enggau nentuka pemansang inklusif sereta ngelakuka budaya, lumba enggau negapka raban nembiak.
“Kitai mega ngemeratka ngagai pengawa nambahka pemeruan rampa menua sereta negapka pengawa meri servis perintah enggau kapasiti,” ku iya. – TVS
