KUCHING, 10 Okt: Program Lan Berambeh Anak Sarawak deka diatur kena 19 Oktober tu lalu deka nungkatka rambai jaku ‘Memperkasa Ekonomi Baru Sarawak’ ba Palan Eksibisyen Enggau Dagang Antarabansa Malaysia (MITEC) Kuala Lumpur.
Menteri Kereja Raya Datuk Seri Alexander Nanta Linggi ke mega Chairman Komiti Besai achara nya madahka, program taun tu ungkup edisyen ke-15 dipelaba deka digulu lebih 6500 anak sarawak ke benung belajar, gawa enggau diau di Semenanjung Malaysia.
Ku terang iya, program serak tu deka diisi enggau mayuh bengkah aktiviti nyengkaum Sarawak Agenda Townhall entara Premier Sarawak Datuk Patinggi Tan Sri Abang Johari Tun Openg begulai enggau nembiak universiti sereta kolej ba palan pelajar tinggi (IPT) di Semenanjung.
“Nya alai, dipelabaka deka digulu urung 6,500iku orang maya malam nya ila iya nya Pengerami Makai Lemai Lan Berambeh.
“Tang Lan Berambeh tu berengkah tumu pagi, 19 Oktober enggau sekeda program nyengkaum Town Hall ti ngaul Premier Sarawak begulai enggau nembiak universiti enggau Kolej Institusyen Pelajar Tinggi di Semenanjung ke alai sida tu datai ari Sarawak.
“Baka ke dipadahka lebih 3,000 sida deka datai. Nya alai, sida datai di MITEC sepemanjai hari ungkup sekeda program,” ku iya.
Iya mansutka penerang nya rambau dirandau media pengudah ngatur penemuai basa ngagai Astana Negeri Sarawak ditu, pagi tadi.
Ku tandu Nanta, TYT Negeri Sarawak, Tun Pehin Sri Dr Wan Junaidi Tuanku Jaafar enggau bini iya Toh Puan Fauziah Mohamad Sanusi dipadahka bela udah setuju sama deka datai ngulu program Lan Berambeh Anak Sarawak 2024.
Nya alai, ku Nanta pekara tu deka ngujungka achara nya lebih besai reti ungkup rayat sarawak berindik ari bisi penatai TYT maya nya.
“Nya alai, taun tu lebih besai reti laban tu taun keterubah Tun, TYT kitai tu nyadi TYT Sarawak laban sebedau tu iya Kaban Parlimen enggau ke bukai lalu kami kaban parlimen enggau komiti tu ngarapka Tun enggau Toh Puan datai.
“Baka ke dipadah tadi, Tun enggau Toh Puan (setuju) deka datai sama,” ku iya.-TVS
