SRI AMAN, 8 Ogos: Program Road To Petronas 50 (RTP50) ‘Discover Petronas at School’ endang bukti nyata ngagai legasyen enggau pengeransing Petronas dalam nempa enggau ngemansangka modal mensia ke bekualiti ungkup menua tu.
Sapit Menteri Pelajar Inovasyen enggau Pemansang Bakat Sarawak Datuk Francis Harden Hollis madah, pekara nya ulih dipeda naka tu urung 39,000 nembiak udah ngasaika pelanja ari serikat minyak enggau gas nasional nya nengah program negapka penemu ke diatur kenyau taun 1975.
“Kenyau ditumbuh Petronas udah nyadi ikon penyulut enggau pengerandang pemansang menua.
“Sekumbang 50 taun Petronas ukai semina ngerandang pemansang menua tang mega bejalaika tanggungpengawa ke chukup beguna dalam ngemansangka pelajar enggau ngansah bakat raban nembiak.
“Petronas ukai semina nempa tuai dudi hari ungkup Sarawak aja tang mega ungkup Malaysia,” ku iya.
Harden ke mega Kaban Kunsil Nengeri (ADUN) Simanggang madah munyi nya maya Program Road To Petronas 50 (RTP50) Discover Petronas At School (DPS) diatur ba Diwan Suarah Sri Aman, kemari.
Ku iya, pengawa ngatur program ke baka nya ulih meri peransang ngagai raban nembiak ke diau ba menua pesisir ngelala bagi batang pengawa ke bisi disedia dalam sektor minyak, gas enggau energi ke bisi ba Petronas.
Tandu iya, nembiak menua pesisir mega patut ngambi bagi enggau nguna manah peluang ke bisi disediaka Petronas nengah program nya ungkup pengidup ke lebih meruan dudi hari.
Sama bisi datai Sapit Residen Sri Aman Charlie Keling enggau ke bukai.-TVS
