KUCHING, 7 Julai: Sapit Menteri Besai Datuk Seri Fadillah Yusof meri terima kasih ngagai semua raban ke bisi nyereta Pengawa Nyidi sereta Mantu (SAR) kaban Batalion Ke-7 Rejimen Antara Menua Soldadu Darat Malaysia Prebet Muhammad Syafiq Hilmi Abd. Halim ke ditemu selamat, kemari.
Ku iya, pengeransing semua raban bekaul nyengkaum Raban Soldadu Besenyata Diraja Brunei (ABDB) ngujungka kaban soldadu ditemu enggau selamat pengudah 19 hari iya diripotka lenyau.
“Terima kasih ngagai Raban Soldadu Malaysia enggau mega raban soldadu Brunei laban udah besaup mantu ngiga siku kaban soldadu kitai ke nyereta pengawa nyukat adan menua lalu pengujungka iya ditemu pengudah ke lenyau semak 19 hari.
“Nyadi terima kasih mih tolong padahka terima kasih ngagai ATM Malaysia enggau mega Soldadu Brunei laban udah mantu pekara nya,” ku iya.
Iya mansutka jaku nya pengudah ngulu Pengawa Nutup Program Bantu MyLesen Kelas B2 Renggat Parlimen Petra Jaya, pagi tadi.
Sebedau tu, Prebet Muhammad Syafiq diripotka lenyau maya nyereta Op Ukur begulai enggau Opis Ukur enggau Kar (JUPEM) ba adan antara menua Malaysia-Brunei kena 18 June tu tadi.
Kelimpah ATM, Operasyen SAR Muhammad Syafiq bela dipasuk Kaban Besenyata Diraja Brunei, Polis Diraja Malaysia, Opis Bomba enggau Penyah Penusah enggau kaban JUPEM.
Muhammad Syafiq mujur tesidika kelai ba arung rintis ke sengaja digaga raban SAR ba kandang endur operasyen nya lalu ngujungka iya mujur tetemuka palan ‘Forward Operating Base (FOB) Tim A.
Ku iya, maya dirandau Muhammad Syafiq dipeda chukup ikak sereta lembut tulang ketegal lepi kelimpah agi meruan ngibun senyata ba tubuh.-TVS
