KUCHING, 5 April: Pengawa ngerikod baru sebarang lagu tebilang enggau nadai pemendar ari penanyi lagu asal baka ke nyadi ba lagu Bekikis Bulu Betis ke diempu Penghulu Andrewson Ngalai endang pengawa ke enda patut.
Presiden Gerempung Anak Seni Iban Malaysia (PASIMA) Isa Lee madahka, ulah ke baka nya tau bendar meri pengerugi ngagai pengempu siti-siti lagu sereta ngerusak industri lagu Iban.
“Aku enggai enda ngelalau barang sapa ke rindu belagu tauka rinduka pengawa upload lagu tebilang.
“Siti pekara ke mesti dikeingatka iya nya kitai mesti nemu nama atur tauka prosedur iya.
“Pekara ke paling mudah dikereja kitai sebedau kitai ngerikod lagu tauka upload lagu orang bukai iya nya kitai mesti minta pemendar ari penanyi asal tauka kompeni tauka produser (lagu),” ku iya.
Isa Lee mansutka timbal penemu nya ngagai pengari TVS Saratok sehari tu tadi bekaul enggau ripot polis ke digaga siku penanyi tebilang Iban.
Kena 4 Mei tu tadi, Penghulu Andrewson Ngalai bisi ngaga siti ripot polis bekaul enggau siti kompeni ke udah bejalaika pengawa ngerikod baru lagu Bekikis Bulu Betis enggau nadai pemendar ari iya empu ke nyadi pengempu lagu asal nya ba Balai Polis Stapang di Sibu.
Ba ripot polis nya, Ngalai minta kompeni tauka penanyi ke bekaul badu agi besadungka lagu ke udah dirikod sida nya ba sebarang pelasar media rama.
Iya mega ngarapka pekara baka tu patut nerima perati ari Opis Seni Pemerindang Sarawak ke pemaik industri lagu Iban jemah.-TVS
