DEBAK, 4 Jan: Ejensi Perintah Besai patut bejalaika pengawa meri licha sereta bekunsi penerang ti lebih silik ngagai rayat di menua pesisir bekaul enggau Sistem Pangkalan Data Besai (PADU).
Sapit Menteri Pemansang Orang Indu, Anak Mit enggau Komuniti (KPWKK) Sarawak, Datuk Mohd Razi Sitam madah, chara ngerejista diri dalam sistem PADU nya patut dikunsi dulu enggau raban Tuai Rumah enggau Tuai Raban Bansa (KMKK) ngambika sida nyamai nerang ngagai bala nembiak redak.
“Sistem PADU tu agi baru nya alai enti ulih bala ejensi perintah lebih agi iyaka baruh Perintah Besai patut ngatur pengawa meri licha dikena bekunsika penerang silik.
“Licha nya patut diterang dulu ngagai bala Tuai Rumah enggau Tuai Raban Bansa (KMKK) ngambi sida bulih penerang silik lalu nyamai nerang ngagai nembiak redak ke dijaga sida,” ku iya.
Iya ke mega Kaban Kunsil Nengeri (ADUN) Saribas madah munyi nya lebuh dipinta meri timbal bekaul enggau Sistem Pangkalan Data Besai (PADU) ke baru dilancharka Menteri Besai Datuk Seri Anwar Ibrahim di Kuala Lumpur apin lama pengudah ngulu Program Berambih Taun Baru 2024 ke diatur Gerempung Tuai Rumah Pelilih Mit Debak ba Diwan Perpaduan ditu, kemari.
Nangkan ke nya, Razi ngelalau mensia mayuh enda ibuh irau laban sistem PADU nya dijamin likun.
Tandu iya, barang sapa ke udah chukup umur manggai 18 taun ke atas patut ngerejista diri nengah chara dalam tali arus berengkah ari diatu.
“Aku ngarapka mensia mayuh enda ibuh irau laban tu (PADU) siti sistem data ke likun deka diguna Perintah Malaysia ba renggat nasional ungkup sida ke udah beumur 18 taun ke atas tau berengkah ngerejista diri,” ku iya.
Nitihka penerang, mensia mayuh ke diau ba genturung pendiau ke ngembuan penanggul nadai arus internet sida ulih ngerejista diri dalam sistem PADU ba opis pelilih besemak enggau sida.
Sistem PADU dipejalaika perintah besai dikena nentuka genap subsidi dipejalaika perintah enda disalah guna lalu ulih datai ba raban diselinting.-TVS
