SARATOK, 1 Jan: Kaban Kunsil Nengeri (ADUN) Krian Friday Belik meransang rayat lebih agi di Saratok terus beserakup sereta bekerejasama nyukung perintah Gabungan Parti Sarawak (GPS).
Ku iya, asil ari penegap politik GPS dia nengeri tu nadai ibuh bepanggai ngagai orang luar dalam ngatur pekara politik.
Friday mega madah, pekara ke ditegika raban ketuai politik di nengeri tu iya nya semina ‘Sarawak First’ reti nya lebih ngemeratka pekara bekaul enggau hak rayat sereta nengeri tu empu.
“Asil ari penegap politik dibaruh iring Gabungan Parti Sarawak kitai nungkatka rambai jaku ‘Sarawak First, Utamakan Sarawak’ enggau Jaga Sarawak Intu Sarawak reti iya kitai enda begunaka orang luar datai kitu (mantu) ari sukut politik,” ku iya.
Iya mansutka pekara nya ba mua mensia mayuh ke bisi ngulu Pengerami Nyambut Taun Baru 2024 di Saratok malam tadi.
Ku terang iya, perintah Sarawak ngembuan sistem politik ke nyelai iya nya ulih nempa polisi kediri berindik ari penegap parti ke merintah.
Nya alai, iya arapka rayat terus meri sukung penuh ngagai perintah awak sebarang hak ke ditagih ungkup nengeri tu ulih dijapai.
“Kitai bisi sistem politik ke nyelai ke alai sekeda parti komponen beserakup dalam siti parti dikumbai GPS.
“Pekara nya ngujungka kitai bisi kuasa sereta ulih nentuka kuing tuju menua kitai tu empu enggau enda ibuh begunaka penemu (pemutus) perintah besai maya deka nempa sesebengkah polisi bekaul enggau Sarawak.
“Nyadi diatu kitai patut ngeringka agi sistem politik laban enti politik kitai (Perintah Nengeri) tegap Perintah Besai pan kering,” ku iya.-TVS
