SARATOK, 27 Dis: Projek Jalai Bajau-Kupang sepanjai 23 kilometer ke beungkus RM90 juta ringgit deka ditinda ba taun baru.
Kaban Kunsil Nengeri (ADUN) Kalaka Mohd Duri madah, pekara nya udah dikerandau iya enggau Direktor Opis Kereja Raya (JKR) sereta Sapit Opis Menteri Pemansang Menua Pesisir enggau Wilayah sebedau tu.
“Aku empu udah betemu enggau Direktor JKR enggau Sapit Opis Menteri Pemansang Menua Pesisir enggau Wilayah bekaul enggau projek Jalai Kupang-Bajau.
“Puji Tuhan taun baru ngarap projek nya ulih ditinda dalam taun baru 2024 jalai lebih kurang 20 lebih kilometer enggau ungkus RM90 juta,” ku iya.
Iya madah munyi nya lebuh dirandau raban media pengudah bejadika Pengerami Ngintu Hari Krismas enggau Taun Baru 2024 ba Rumah Panjai Senyawan, ditu kemari.
Berebak enggau nya, Mohd Duri madah diri endang naka ulih bejalaika tanggung pengawa lebih agi mutarka penanggul ke bisi ditapi rayat di menua Kupang enggau Bajau.
“Projek Jalai kupang-Bajau endang lama udah dirandaka mensia mayuh.
“Nya alai, arapka peminta kitai tu didinga ba DUN enggau Parlimen lalu aku pengari rayat N.38 sigi naka ulih minta (projek) enggau raban ke bekaul,” ku iya.-TVS
