SARATOK, 27 Dis: Urung 118 iku peranak Rumah Panjai Ikom di Senyawan ditu udah nyuaka pom nyadi kaban Parti Pesaka Bumiputera Bersatu (PBB) Pampang Kalaka.
Tuai Rumah Ikom Sidom madah, pemutus nya diambi sida serumah laban ngasaika nadai parti bukai kelimpah ari parti PBB ti dikearap ulih mai pemansang seraya ngemeratka pengelantang rayat di sitak nya.
“Baka ditemu kitai beberapa iti projek ke udah enggau benung digaga ba Senyawan ditu nyadi kelai pengeransing Yang Berhormat (Mohd Duri) endang siku orang ti siru enggau rayat di Senyawan,” ku iya.
Iya madah munyi nya lebuh bejaku ba mua mayuh nyerumba Pengerami Ngintu Hari Krismas enggau Taun Baru 2024 ba Rumah Panjai Senyawan ke digulu Kaban Kunsil Nengeri Kalaka, Mohd Duri kemari.
Ku terang iya, pemutus milih PBB laban beratika parti nya ti tegap sereta nyadi kubu kuat ba sitak Kalaka.
Sida mega ngarapka ari milih PBB mega deka ngujungka mayuh agi pemansang datai ke menua Senyawan enggau genturung besemak udah tu ila.
“Kelai pengerindu kami ke nuan YB nya alai kami serumah bisi berandau deka nyerahka pom nyadi kaban PBB kami di Senyawan ditu.
“Ukai aku madah parti bukai enda manah tang semua parti manah laban begempung dalam GPS.
“Tambah mega kitai (N.38 Kalaka) ditu endang penuduk PBB, nya alai kami nyerahka pom kami nya ngagai PBB,” ku iya.
Kelimpah ari perayat ba Rumah Panjai Ikom Sidom peranak bukai sama bisi nyuaka pom masuk PBB iya nya Tuai Rumah Embol Asom ari Sungai Anak, Roban ngarika sida serumah ti bisi 28 iku.-TVS
