KUCHING, 22 Dis: Urung 650 buah rumah sembiang ukai Islam di selampur Sarawak udah dikemansangka nengah Unit Pekara Pengarap Bukai (UNIFOR).
Direktor UNIFOR, Datu Jack Aman Luat madah semua 650 buah projek infrastruktur tauka projek rayat ke dikemansangka nya dikemendarka nengah Opis Premier Sarawak.
“Nyadi Premier Sarawak (Datuk Patinggi Tan Sri Abang Johari Tun Openg) enggau Sapit iya (Datuk Amar Douglas Uggah Embas) chukup nyukung sereta mantu (projek rumah sembiang ukai Islam) nengah UNIFOR).
“Chunto taun tu iya bisi meri geran RM100 juta dikena diberi nengah UNIFOR dikena nyeruri rumah sembiang.
“Ari RM100 juta nya, dia RM20 juta dikena ngemansangka sekula misyen,” ku iya.
Jack mansutka penerang nya maya dirandau nengah Program Dialog TVS ke bejuraika pejuluk Segulai Sejalai Dalam Penyerekang Daya Idup ke dibantai malam tadi.
Nangkan ke nya, ku Jack diatu bisi 127 buah sekula misyen di seluruh Sarawak. Nyadi semua sekula tu diungkupka ari belanja RM20 juta.
“Agih ungkup semua tu suah disebut YAB Premier lebuh iya ngemunka pengawa pemansang baka Pelan Strategik Pemansang Pasca Covid-19 2030 (PCDS 2030),” ku iya.
Nya alai, Jack ngarika UNIFOR meri besai terima kasih ngagai Premier Sarawak enggau Datuk Amar Douglas ke nyadi menteri nyaga Unifor, laban berekat sukung sereta penemu ari seduai iya dia perintah bisi ngembuan polisi ke mungkur semua.
Pia mega Jack meransang mensia mayuh terus gawa bebendar seraya negapka rambai jaku ‘Segulai Sejalai’ begempung , betulung lebih agi ngagai sida rebak baru tu awak sida ulih ngemeranka perangai ke manah ngambika Sarawak terus likun sereta lantang senang.
Ba pengujung randau Jack meri Selamat Hari Krismas enggau Taun Baru ngagai semua raban Kristian enggau semua rayat di nengeri tu.-TVS
