KUCHING, 15 Dis: Semua projek pemansang ti dipejalaika ba baruh Opis Menteri Infrastruktur enggau Pemansang Penyangkai Kapal (MIPD) mesti meri empas ke manah ngagai rayat enggau tembu nitihka timpuh ke udah ditaga.
Sapit Premier Sarawak ke mega menteri MIPD, Datuk Amar Douglas Uggah madahka nya sekeda objektif ti dikemeratka pengudah iya megai pangku pengawa nyadi menteri ti ngiring MIPD kenyau ari taun 2022.
“Aku berasai chukup betuah laban disempulang dua iku sapit menteri ti bekenanas gawa iya nya Dato Majang Renggi enggau Datuk Ir Aidel Lariwoo,” ku iya madah rambau Program Malam Meri Pengaga enggau Pra Krismas lebuh Hari Empat.
Uggah nerangka, kedua-dua iku sapit menteri nya deka berati sereta matau projek ba serata Sarawak dalam mantu ngemujurka semua pengawa ba baruh MIPD.
“nengah peluang tu aku deka meri besai pengaga ati ngagai semua kita ke udah ransing gawa sereta terus bejalaika pengawa enggau manah,” tandu iya.
Nangkan ke nya, Uggah mega deka nentuka penyangkai kapal di Sarawak bisi daya napi pemar dudi hari enggau besemekih ba renggat serantau, antarabansa sereta nyendiaka servis ke ngemudahka pemansang ekonomi nengeri tu.
Ku iya madah, antara penanggul ke mesti diputarka MIPD diatu iya nya penambah penyampau projek sakit enggau tetanggul sepemanjai timpuh pandemik pasca COVID-19.
Pasal pekara bukai, iya madahka Premier Sarawak Datuk Patinggi Tan Sri Abang Johari Tun Openg minta MIPD mantu ngemujurka pemansang Penyangkai Kapal Tanjung Embang ke baru.
Penyangkai kapal nya jemah deka nyadi pintu penama maritim ungkup industri minyak enggau gis di wilayah selatan nengeri tu. – TVS
