SARATOK, 15 Dis: Sekeda Balai Bomba Enggau Penyah Penusah Malaysia (JBPM) di nengeri tu deka disikap enggau entukar utiliti ke dikumbai ‘Compact Fire Rescue Tender’ (CRFT).
Direktor JBPM Sarawak, PKPjB Datu Khirrudin Drahman madah, pengawa meri CFRT nya deka dipejalaika abis laun ba pun taun baru (2024).
“Kitai udah dikemendarka perintah lalu prototaip pan udah tembu kitai deka bisi beberapa unit ‘Compact Fire Rescue Tender’ (CFRT) besaiz mit ke engkeman dikena di Sarawak.
“Tu senutuk enggau gaya rampa menua di Sarawak nitihka penerang ari opis pengawa nyadung CFRT nyangka deka dipejalaika ba pun taun baru,” ku iya.
Iya madah munyi nya lebuh dirandau media pengudah tembu Pengawa Nemuai Seraya Gawa Sehari Ngagai Balai Bomba enggau Penyelamat (JBPM) Saratok kena Hari Empat.
Ku terang iya, balai bomba di Sabah enggau Sarawak deka dikenuluka ba sentang pekara tu berindik ari raban bomba di menua tu suah betapi enggau penanggul lebuh sida bejalaika pengawa ba genturung pendiau ke ngembuan jalai ti mit.
“Sarawak enggau Sabah deka dikenuluka munyi dipadah Tuai Direktor apin lama.
“Nya (CFRT) deka dulu diberi ngagai Sabah, Sarawak laban ditu chukup begunaka nya lebih agi injin ke mit,” ku iya.
Ku Khirrudin kereban injin endang manah lalu dikearapka ulih diberi enggau lengkas ngagai balai ke patut.
“Aku udah meda dalam timpuh dua bulan udah bisi ba woksyop endur ngetis sereta masang.
“Urung 150 buah CFRT ti deka disadung ngagai balai ba selampur Malaysia,” ku iya seraya ngarapka Sarawak bulih penyampau CFRT ke patut dikena ngelancharka agi pengawa raban bomba di nengeri tu.-TVS
