SPAOH, 14 Dis: Projek Ngaga Jalai Ulu Paku ke Ulu Kota diatu bejalai lanchar sereta ditaga tembu bulan Januari 2027.
Sapit Premier Sarawak, Datuk Amar Douglas Uggah Embas madah, projek ke beungkus RM247 juta nya diatu udah manggai 4.4 peratus tembu sepengudah 44 hari projek nya dipejalaika.
“Sehari tu kami ngabas projek ngaga Jalai Ulu Paku-Ulu Kota. Nyadi jalai tu deka mansa tiga sitak Kunsil Nengeri (DUN) Bukit Saban, Krian enggau Pakan ti nelan belanja manggai RM247 juta,” ku iya.
Iya madah munyi nya ngagai media rambau ngabas Projek Jalai Ulu Paku ke Ulu Kota ditu kena Hari Dua.
Berindik ari nya, Uggah ke mega Menteri Infrastruktur enggau Pemansang Penyangkai Kapal (MIPD) Sarawak ngelalau raban kunterktor ulih neruska momentum ke manah dalam nentuka projek nya bejalai enggau lanchar.
“Kitai melabaka jalai tu ulih tembu ba bulan Januari 2027.
“Taja pia kitai nguji minta tulung sida JKR (Opis Kereja Raya) beratika enggau naka ulih enti ulih (rumban) tembu ba taun 2026 laban taun 2026 iya nya taun ke besai reti ngagai kami tiga (ADUN) lalu berasai gaga laban projek jalai tu udah nyata.
“Pejalai projek naka ke diatu ngemantupka ati enggau 4.4 peratus tembu dalam timpuh 44 hari lalu ngarapka kunteriktur ulih neruska momentum nya taja kitai nemu ba bulan Januari enggau Februari ti deka datai tu iya nya musin landas,” ku iya.
Sama bisi datai iya nya Kaban Kunsil Nengeri (ADUN) Krian, Friday Belik, ADUN Pakan, Tan Sri William Mawan Ikom enggau ke bukai.-TVS
