BALEH, 19 Nov: Sarawak Energy Berhad (SEB) nempa kaul enggau komuniti baleh nengah pengerami main adat asal enggau kimpin nanam kayu ba Projek Tekat Baleh (Baleh HEP).
Program Tanggungpengawa Rama Korporat (CSR) raban SEB nya endang sebagi ari komitmen bekaul enggau pengawa ngintu budaya enggau rampa menua ngambika enda tebunsa tauka lenyau ngapa.
Kelimpah berami mandangka budaya, kimpin nanam kayu nya mega dikemujurka SEB nengah kerejasama Opis Betanam Betupi (DOA) Sarawak enggau Komuniti Baleh.
Menijar Besai SEB Baleh HEP, Tan Hang Kiak madah, naka tu tuju inisiatif program nya dikena bebasa enggau nyaga pengaya budaya komuniti Iban di Baleh.
“Pengawa ngintu budaya enggau warisan, sereta nyaga rampa menua endang sebengkah ari inisiatif pemeranak puku rama ungkup Sarawak Energy betuju ngetanka pesaka budaya bansa Iban Sarawak, nempa semangat nulung komuniti nengah gaya sambut enggau ngidupka baru main sereta adat lama, kelimpah mantu ngaduka pemeruan dunya,” ku iya.
Nangkan ke nya, Menijar Servis Projek SEB, Sharina Bohari madah lebih 2,000 paung kayu buah udah disadung enggau ditanam ba rumah panjai besemak di Baleh.
“Kami udah mujur nyadung enggau nanam lebih ari 2,000 paung kayu buah ngagai rayat Baleh.
“Tu endang komitmen enggau sukung SEB dikena nyungkak penatai pemisi rayat lalu nya mega seriris enggau Kimpin Nanam Kayu Penuh pengelama 10 taun seraya nanam enggau ngelindung 500,000 kayu manggai taun 2030, “ku terang iya.
Udah nya, Tuai Rumah Unggam ngarika siku ari tuai rumah di Baleh meri terima kasih ngagai pengawa SEB dalam ngesan tanggungpengawa sida dkena ngetanka identiti komuniti besemak.
“Terima kasih Sarawak Energy laban udah ngatur program ke baka tu.
“Nengah pengawa tu dia adat asal Iban enda lenyau ditelan jeman. Arapka terus diatur ba taun dudi,” ku iya.
Bela bisi meri timbal ke sama, Pegawai Pelilih Bukit Mabong, Calvin Ligong ti ngasaika pangka pemansang HEP Baleh nya meri pekara positif ngagai komuniti besemak.
“Nama ke ulih dipeda ari sukut pangka pemansang projek Tekat Baleh, terubah iya suba kitai agi disambungka nengah mode servis pengangkut sungai tang laban pangka ke positif ari pemansang HEP Baleh, projek jalai raya.
“Diatu kitai ulih dilawa ari Pasar Kapit semina dalam sejam setengah udah ulih datai ba menua Antawau, enggau nya mega meri pangka positif ngagai raban sekula,” ku iya.
Calvin udah nya bisi madah pangka positif nya mega deka diasaika bala pengajar enggau nembiak sekula ba sitak nya.
Nangkan ke nya, penemu ke sebaka bdibantaika Kepala Pengajar Sekula Primari (SK) Temenggong Koh, Peter Kedit ti setuju enggau pengawa SEB kenyau beberapa taun ke udah laban udah mayuh mantu sekula sida.
“Mayuh mega bantu HEP Baleh ngagai sekula kami.
“Chunto iya, kipas, PA Sistem, bup-bup akademik lalu kami pan endang siti ari sekula anak ambu ungkup HEP Baleh, kami pan mayuh bekerejasama enggau sida, endang bakih kerejasama sekula kami mih,”ku iya.
Dulu ari nya, bisi ngemataka SEB nyuaka bantu ngagai 54 rumah panjai ba baleh dikena mantu rayat ke diau besemak nengkira diri meli barang Krismas ke deka diintu enda lama agi.-TVS
