BETONG, 19 Okt: Naka tu agi nadai isu nembiak ditagang rejister ba Universiti Malaysia Sarawak (UNIMAS) ketegal enda tebayarka duit panjar rejister.
Mandal Chanselor UNIMAS Prof Datuk Dr Mohamad Kadim Suaidi madah, UNIMAS enda kala nagang barang sapa nembiak ti apin ulih mayar panjar rejister lebuh sida bisi nerima kangau belajar ba palan pelajar nya.
“Kitai endang ngemendarka nembiak seranta ngerejister diri belajar ba UNIMAS taja sida empai ulih mayar panjar belajar.
“Kitai tetap nerima sida tu belajar nyema bisi bulih kangau nampung belajar ari UNIMAS.
“Enti apin ulih mayar panjar utai tu endang suah nyadi lebih agi dalam timpuh tiga empat lima taun ke udah tu lalu kitai kebendar udah bisi polisi kediri ngatur sida ngambika dikemendar ngerejister diri belajar ba UNIMAS,” ku iya.
Iya madah munyi nya lebuh dipinta meri timbal bekaul enggau penemu dipansutka Menteri Besai Datuk Seri Anwar Ibrahim sebedau tu mesan semua universiti perintah dimenua tu anang nulak nembiak ke enda tebayarka duit panjar ungkup rejister masuk universiti.
Ku iya naka diatu semua pekara ti bekaul mega mujur diputarka nengah duit turu ari ejensi perintah ke bisi di menua tu baka ari Duit Turu Wakaf, Duit Turu Pengelantang Nembiak enggau mayuh agi ke bukai.
“Semua nya (bayar panjar rejister) deka diaduka kitai pengudah sida ngerejister diri.
“Kitai mayuh penatai belanja ulih dikena kitai baka nengah Tabung Wakaf lalu perintah mega bisi Turu Pengintu Pengelantang Nembiak Pelajar, Wang Turu Baitumal enggau ke bukai ti diungkupka khas ngagai anak Sarawak.
“Bisi mega turu bukai ke ulih dikena mantu raban nembiak seranta tu sida enda ibuh irau nyema bisi bulih kangau belajar ari UNIMAS laban sida tetap ulih ngerejister diri belajar…utai tu udah suah diatur,” ku terang Kadim.
Dulu ari nya, Program Outreach UPU2U 2023 nya diatur Opis Pelajar Tinggi (KPT) dikena meri penerang bekaul enggau pekara pelajar kelimpah Program Beperesa Pengerai dikumbai KPT Prihatin Madani diatur dua hari bejurut ba Diwan Lumba Tan Sri Datuk Amar Stephen Kalong Ningkan enggau Rumah Panjai Bantan Sungai Langit, Layar Betong.-TVS
