SARATOK, 9 Sept: Program Hari Tebuka diatur Opis Pelajar Pelilih (PPD) Saratok engkeman dikena bekunsi sekeda inisiatif ti bisi dipejalaika opis nya enggau komuniti.
Kaban Kunsil Nengeri (ADUN) Krian Friday Belik madah, program nya mega mandang ke pengeransing Opis Pelajar Nengeri Sarawak (JPNS) enggau Opis Pelajar Malaysia (KPM) nentu ke agenda pelajar ulih dipejalaika enggau mujur.
“Tu mandang ke pengeransing Opis Pelajar Nengeri enggau Opis Pelajar Malaysia (KPM) nengah Opis Pelajar Pelilih Saratok ngemanah pekara pelajar ba Pelilih Saratok ngatur program ke pemaik komuniti ditu,” ku iya.
Iya madah munyi nya lebuh bejadika Hari Tebuka Transformasyen Pelajar diatur Opis Pelajar Pelilih (PPD) Saratok ba Diwan Tebuka Sekula Primari (SK) Abang Abdul Rahman Saratok, tadi.
Ku Friday, program nya ulih nyadi siti pelasar engkeman endur bala tuai-tuai opis perintah bekunsi penerang enggau mensia mayuh.
“Hari Tebuka Transformasyen Pelajar baka tu siti program ke chukup manah endur bala tuai opis perintah bekunsi penerang enggau komuniti.
“Ari program baka tu, mensia mayuh ulih nemu inisiatif tauka pengawa ke digaga JPNS enggau KPM,” ku iya.
Ba program nya, Friday bisi ngungkup ke agih sepenyampau RM20,000 ngagai PPD Saratok dikena ngatur program ke bekaul.
Sama bisi datai Sapit Direktor Kanan Begian Pengatur Sekula Pulai Hari (BPSH) Opis Pelajar Malaysia (KPM), Omar Mahli, Tuai Penulung Direktor Sektor Perambu enggau Pengatur PPD (SPPD) Opis Pelajar Nengeri Sarawak, Ismail Gani enggau Tuai Pegawai Opis Pelajar Pelilih (PPD) Saratok, Anis Madeli.-TVS
