SRI AMAN, 7 Julai: Kaban Parlimen Sri Aman, Dato’ Sri Doris Sophia Brodi madahka konsep madani ti diangkatka perintah penyerakup kebendar udah lama dikemeranka rayat di nengeri tu.
Iya madahka, rayat pupu bansa ba nengeri tu idup segulai sejalai, bebasa ke pangan diri taja pan bisi bida, lalu nya mih ti pemanah daya idup ba Sarawak.
“Sarawak diuan rayat pupu bansa lalu ulih idup begulai sama. Enti enda silap aku kitai ditu bisi lebih 30 etnik.
“Taja kitai mayuh, tang kitai ulih idup begulai laban kitai chukup bebasaka pangan diri. Nya mih penyelai ti dikembuan Sarawak,” ku iya.
Iya mansutka jaku nya rambau Program Merarau Begulai enggau penyereta Konvoi Kembara Sarawak Merdeka Bagi Menua Sri Aman ditu, sehari tu.
Nangkan ke nya, ku Doris rikod sejarah mandangka pemansang ti dijapai di Sarawak endang asil ari penyerakup ti dikemeranka rayat sereta mesti terus ditanka sampai ke jemah ila.
Nya alai, iya madah budaya enggau daya pengidup rayat pupu bansa ba nengeri tu nyadi aset ti pemadu berega lalu patut terus dikerembaika.
“Nya kebuah aku minta semua kitai pesan tu mesti ditesau ngagai kaban belayan ke bukai enggau ngarapka bala anak kitai, rebak dudi sama bela nerenak semangat tu,”ku iya.
Ku terang Doris, konsep baka nya mesti dikerembai ngambika Sarawak nyapai mayuh agi pemujur dudi hari.-TVS
