KUCHING, 9 Mac: Ngatur Woksyop Ngelatika Jaku Iban Dalam Komunikseyen endang nemban sereta patut diatur ngambi ke semua pemekuh media sama bechuanka sistem Jaku Iban ke standard.
Menteri ba Opis Premier Sarawak, Datuk John Sikie Tayai madahka Jaku Iban bisi bida nitihka siti-siti pelilih menua sereta mesti deka diseraris awak ke semua bela nemu reti enggau ngena dalam pengidup besehari-sehari.
“Tu mih entara pemar ke ditapi kitai. Nya kebuah aku meda woksyop baka tu endang patut diatur awak ke ulih nyerariska jaku Iban sereta mensia mayuh nyamai ninga, ngena enggau nyebut jaku asal kitai tu,” ku iya madah.
John ke mega Kaban Kunsil Nengeri (ADUN) Kakus nerangka nengah woksyop nya mega raban pemekuh media ke nyerangkung pengarang berita, penyalin berita, pemacha enggau ke bukai bisi penau nguna leka jaku ke betul sereta diperetika semua orang.
“Aku merambu ngambi ke Unit Komunikasi Awam Sarawak (UKAS) enggau Opis Pelajar Nengeri Sarawak (JPNS) bela besaup bejalaika tangkup pengawa nyerariska jaku Iban ti ulih nyadi malin enggau chuan semua serak raban bansa ti siru sereta rindu bejaku Iban,” tandu iya.
Iya mansutka jaku nya rambau dirandau raban media pengudah ngarika Sapit Premier Sarawak Datuk Amar Douglas Uggah Embas bejadika pengawa nutup Woksyop Ngelatika Jaku Iban Dalam Komunikesyen 2023 ti diatur Unit Komunikasi Awam Sarawak (UKAS) enggau Opis Pelajar Nengeri Sarawak (JPNS) lebuh Hari Tiga.
Nitihka rikod, woksyop nya diatur tiga hari berunggu belabuh ari 6 nyentuk 8 Mac 2023 ba sebuah hotel tebilang di Kuching sereta digulu lebih 40 iku penyereta ti datai ari raban pemekuh media Iban di Sarawak.
Sama datai Sapit Menteri Dagang Temuai, Industri Kreatif enggau Seni Pemerindang Sarawak Datuk Snowdan Lawan, Sapit Menteri Pelajar, Inovasyen enggau Pemansang Bakat (Pemansang Bakat) Datuk Francis Harden Hollis, Direktor UKAS Samuel Simon, bala tuai opis perintah, penyereta sereta temuai dipebasa ke bukai. – TVS
