KUCHING, 2 Jan: Perintah Sarawak deka meri perati penuh ngagai pemansang infrastruktur pemun ba taun 2023, ku Dato Sri Dr Sim Kui Hian.
Sapit Premier Sarawak nya madah, entara pemansang infrasturktur pemun ke deka digaga nya nyengkaum bekal ai, karan enggau jalai raya.
“Berengkah taun 2023, Sarawak dalam kandang lima taun tu deka nembuka mayuh infrastruktur pemun, nyengkaum bekal, karan enggau jalai raya,” ku iya.
Dr Sim, ke mega Presiden Parti Sa’Ati Rayat Sarawak (SUPP) , madah udah datai maya iya Sarawak ngalih ngagai asil penatai pemisi ke baru.
“Udah datai maya iya endur kitai nyingkang ngasilka penatai pemisi nengah ekonomi baru, baka ekonomi digital enggau kuasa gadung munyi ke suah disebut (Premier Sarawak) Datuk Patinggi Tan Sri Abang Johari Tun Openg, manggai taun 2030, kitai ulih nyapai Strategi Pemansang Pasca Covid-19 (PCDS 2030) ungkup Sarawak.
Dr sim ke mega ADUN Batu Kawah madah munyi nya nengah sebengkah video pandak ke dibantaika ba laman rasmi Facebook iya nyerumba Taun Baru 2023.-TVS
