KUCHING, 11 Nov: Perampa besai kitai ungkup maya ti deka datai patut bisi siku ari indu bansa kitai Dayak dichiri nyadi sekretari perintah nengeri Sarawak dudi hari, ku Dato Ir. Alice Jawan Empaling.
Sekretari Mendam ba Opis Menteri Perengka Pengangkut Sarawak nya madah tu entara juluk tauka perampa besai dalam timpuh empat tauka lapan taun ti deka datai.
Kebuah pia ku iya, tu mih maya iya laban perintah udah nyebut deka meri peluang tauka penuduk pengawa tikas ke baka nya ngagai raban orang indu dalam dalam manifesto pengawa bepilih sida.
“Nya alai, lebuh nurun ngundi tu ila keingatka mih danji ke udah disebut perintah nya. Pia mega, kitai deka meda mayuh agi sida ke indu dichiri nyadi SUT (Sekretari Mendam) ba opis menteri, direktor-direktor ba ejensi perintah. Nya utai ke patut diperatika kitai.
“Kitai mega deka meda indu kitai Dayak dipadu nyadi Tuai Pelilih Menua (D.O), Residen asaiku empai bisi sekumbang 60 taun menua Malaysia udah ditumbuh. Indu Bidayuh asaiku bisi siku, tang kitai indu Iban bedau. Nyadi tu mih maya iya,” ku iya.
Alice mansutka penemu nya maya dirandau pematak randau TVS ba Program Iban Malaysia Dicides bejuraika topik Ngenegapka Orang Indu Ungkup Pemansang Menua nyerumba Pengawa Bepilih Besai Ke-15 (PRU-15) malam kemari.
Dulu ari nya, Alice madahka pengandal ati diri arapka dudi hari perintah mega ulih meri peluang ngagai raban indu Iban dipadu ngiring kompeni ke bekaul enggau perintah (GLC).-TVS
