SIBU, 5 Mei: Pemansang di sitak Kunsil Nengeri (DUN) Tamin terus nyadi pekara ti dikemeratka pengari rayat Ir Christopher Gira Sambang dalam timpuh lima taun tu.
Iya madahka, pemansang nya nyerangkung infrastrakcha, internet sereta perengkaguna bukai ungkup pengelantang rayat.
“Pemansang internet endang chukup diguna kemaya hari tu. Sekalika ba pengawa dagang, sekula enggau betanam betupi.
“Diatu dunya nyau majak mansang bekenaka teknologi ke ukai semina orang diau di mengeri aja nguna,” ku iya madah rambau bejaku ba dalam program Majlis Kesyukuran Kemenangan Gabungan Parti Sarawak (GPS) Pusat Daerah Mengundi (PDM) Lemai apin lama ke udah.
Kelimpah ari nya, Gira udah merambu ngagai Sapit Menteri Pengerai II, Datuk Aaron Ago Dagang minta perintah besai numbuhka sebuah sepital di pelilih Selangau.
“Pemayuh pengani ke mendam di Selangau diatu lebih ari 30,000 iku lalu nya kebuah sebuah sepital patut digaga ba ditu,” ku iya madah.
Ba pengerembai ke sama, iya arapka ba dalam kandang lima taun tu deka numbuhka sebuah ejensi pemansang di Selangau baka Regional Corridor Develoment (URDA), Highland Develoment Agency (HDA), Sri Aman Development Agency (SADA).
“Ejensi baka tu chukup beguna dikena kitai ngeranchakka agi pemansang di kandang menua tu.
“Baka ke ditemu kitai, Selangau ba endur ke strategik iya nya ba tengah Penyangkai Kapal Rejang enggau Penyangkai Kapal Bintulu,” ku iya madah agi.
Kelimpah ari nya, iya madahka Sekula Sekondari (SMK) Selangau dijangka digaga pengudah dikemendarka perintah sereta diatu pelin projek nya benung ba renggat dilangkar.
