KUALA LUMPUR: Sepenyampau RM150 juta diungkupka maya Pengawa Bepilih Nengeri (PRN) Sarawak tu ila berindik ari Kunsil Nengeri (DUN) udah direrak kena 3 November nyin tadi.
Agih belanja tu nyengkaum belanja ba perengka pengawa bepilih, pemansang teknologi maklumat dan komunikasi (ICT) logistik enggau elawin pekereja pengawa bepilih.
PRN Sarawak dijangka deka diatur bulan baru pengudah Kepala Menteri Sarawak Datuk Patinggi Abang Johari Tun Openg madahka ngagai SPR darurat diketuka.
Menteri Ba Opis Kepala Menteri (Parlimen enggau Undang-Undang) Datuk Seri Dr Wan Junaidi Tuanku Jaafar madahka, ungkus RM150 juta kena PRN nya nyengkaum belanja ungkup perengka Covid-19 enggau ngambi kira ngaduka garis lalau nagang pengekai igi penyakit Covid-19 maya bejalaika pengawa bepilih nengeri ila.
Iya mansutka jaku nya nyaut timbal Wong Ling Biu (Ph-Sarikei) ti minta perintah mantaika penyampau ungkus belanja pengawa bepilih Sarawak, di Dewan Rakyat kena Hari Empat.
Sebedau tu SPR deka ngatur aum khas dalam timpuh ke semak pengudah nerima berita darurat diketuka Yang Dipertuan Agong.
Ba baruh Seksyen 3 (4) pengawa bepilih nengeri deka diatur dalam timpuh 60 hari ari timpuh Proklamasi Darurat (Sarawak ) diketuka.
Sebedau perintah darurat di serata menua diketuka kena 11 November nyin tadi, Yang Dipertuan Agong ngenukuka Proklamasi Darurat ba Sarawak ti berengkah 2 Ogos nyentuk 2 Februari taun baru ketegal ari pandemik covid-19.
`
