KUALA LUMPUR, 11 Nov: Malaysia dikumbai menua enda gerai laban mayuh rayat di menua tu ngembuan penyakit tungkul ati enggau obesiti ke tinggi.
Menteri Pengerai, Khairy Jamaluddin madahka, pemereti ati senentang sukut nyaga pengerai rayat di menua tu mega agi ba tikas ke kurang.
“Enti kita nanya aku ke nyadi menteri, Malaysia menua ke gerai tauka enda? Enda. Menua kitai entara menua ti ngerikodka kes obesiti, sakit tungkul ati ke tinggi ti nyadi entara pun kebuah kes pemati ketegal COVID-19 di menua tu.
“Tu ketegal mayuh ari pesakit tu bisi penanggul pengerai ke raya tauka komobiditi.
“Kitai ulih meda di Malaysia siku ari dua iku rayat napi penaanggul lebih berat tauka obesititi ti nyengkaum aku empu, seraya siku ari empat iku rayat Malaysia enda ngemeratka pengawa nyaga pengerai,” ku iya madah.
Nangkan ke nya, bepelasarka statistik, setengah juta iku rayat besai tuai di menua tu bisi napi penyakit tusut runding.
“Aku pechaya penyampau tu agi kurang ti dibanding enggau penyampau ke patut,” ku iya madah lebuh dirandau ba dalam program Selamat Pagi Malaysia sehari tu.
Iya nerangka, senentang dikena nyapai juluk Agenda Nasional Malaysia Sihat (ANMS), tetiap iku rayat Malaysia mesti ngubah ulah diri sereta nambahka pemereti ati nempa rayat enggau menua ke gerai ti enda kelalu bepanggai ba opis menteri pengerai tauka perintah aja.
