KUALA LUMPUR: Aum Kaunsil Mulaika Pemanah Menua (MPN) ngelanggur garis entara menua dibuka abis laun 1 Januari 2022.
Pengawa muka garis entara menua tu ngagai temuai menua luar digaga dikena mulaika pemanah menua lebih agi dalam sektor dagang temuai.
Chairman MPN, Tan Sri Muhyiddin Yassin madahka komiti khas mutarka pandemik ti betuaika Menteri Besai Datuk Seri Ismail Sabri Yaakob deka beratika pekara nya enggau belalauka taga tuchuk vaksin menua dikena ngemendarka temuai tama ke Malaysia.
“Tu patut dipadah enggau naka pengelengkas dibuka. Enti garis entara menua dibuka , ukai buka semua orang ulih datai, menua nya deka dipilih nitihka menua ti udah mujur (nagang Covid-19), nyadi sida ti datai ari menua luar nya aja dikemendar tama ke menua kitai,” ku iya maya nyadi chairman ba aum MPN Bilangan Lima kena Hari Empat.
Ku iya madah, pemutus deka muka garis entara menua diperunding berindik ari pemujur program tuchuk vaksin menua ti udah nyapai 95 peratus .
Ku iya, sektor dagang temuai menua dipeda lubah pulai manah ketegal nadai penatai temuai antarabansa kelimpah sektor tu mega begunaka timpuh deka ngeranchakka baru aktiviti dagang sida.
