Kuching, 26 Jun – Dua kluster baru ditukuka di Sarawak naka hari lima iya nya Kluster Jalai Renggas di Kuching enggau Kluster Jalai Kidurong Lima di Bintulu.
Komiti mutarka penusah ngenyit nengeri (JPBN) Sarawak madahka, Kluster Jalai Renggas, iya nya kluster endur gawa ti disidi ke ngaul pekereja ba sebuah worksyop kerita ba Jalai Renggas Kuching.
“Bisi 26 iku udah diperesa ke alai semilan kes ditetapka positif covid-19 ti nyengkaum kes indeks, 11 kes ditetapka negatif sereta 6 kes agi nganti pemutus ari makmal.” ku JPBNS madah ba dalam siti penerang media maya hari lima.
Berebak ari nya, Kluster Jalai Kidurong Lima, kluster endur gawa ke ngaul kuarters pekereja sebuah serikat injiner ba baruh atur nagang pemindah diteritka PKPD di Jalai Kidurong, kandang endur pengawa industri Kidurong, Tatau.
Kluster tu nyadi ba pun ari pengawa rama enggau kontak semak entara pekereja enggau orang ke diau ba dalam kuarters nya.
Nangkan ke nya, bisi 116 iku udah diperesa, ke alai 20 kes ditetapka positif COVID-19 ti nyengkaum kes indeks enggau 96 kes agi nganti pemutus makmal.
Semua kes positif COVID-19 ba kedua-dua kluster tu dipasuk ke sepital Bintulu enggau PKRC di pelilih Bintulu ngambika diengkah kediri enggau diperubat.
JPBNS mega madahka, empat kluster udah punas sepengudah nadai ngerikodka kes baru dalam timpuh 28 hari ke ngaul kluster nya.
Kluster punas nya ngaul Kluster Jalai Limbang, Miri, Kluster Bako Hilir, Kuching, Kluster Jalai Lilin, Miri enggau Kluster Kampung Semerah Padi fasa 1, Kuching.
