KUCHING: Pengemeran bas ekspres ari Gerempung Kompeni Pengangkut Bas Sarawak (SBTCA), ti tekeruga asil penatai pemisi ketegal pengelekai igi penyakit COVID-19, minta bantu ari perintah ngambika sida ulih meruan bejalaika pengawa sida.
Sekretari SBTCA, William Chan, madah, naka ke diatu, siti kompeni ti nyadi kaban gerempung nya udah ngetuka operasi enda lama, lalu siti agi ngantung pengawa laban enda ulih nanggung kos operasi.
Taja pia, lapan kompeni bukai ti nyadi kaban SBTCA agi ngenanka diri tang semina dikemendar bejalaika 50 peratus aja pengawa, ketegal Standard Atur Pengawa (SOP) dalam Atur Nagang Pemindah (PKP) ti dipejalaika enggau terit.
Chan madah, Pakej Bantu Khas Sarawakku Sayang Keenam (BKSS 6.0), ti dipansutka perintah nengeri apin lama ti udah, nadai ngerintaika pengemeran bas tauka deriba bas ekspres nyadi penerima bantu nya, taja pan sida entara orang ke kena empas ari pengelekai igi penyakit COVID-19.
“Sebedau pengelekai COVID-19 di Sarawak, kaban gerempung tu bejalaika 164 iti bas ekspress ti dibai 331 iku deriba enggau pemayuh penumpang urung 60 peratus, tang diatu semina tinggal 101 iti bas enggau 226 iku deriba ti semina mai lima peratus penumpang,” ku Chan.
William mega madah, gerempung sida udah nganjung surat peminta ngagai perintah nengeri ngambika enda ibuh mayar suwa kaunter tikit bas ekspres di nengeri tu, tang nyentuk ke diatu, sida bedau bisi nerima saut.
