KUALA LUMPUR: Malaysia ngerikodka penyampau kes positif COVID-19 ti pemadu tinggi kediatu, iya nya 6,075 kes, kenyau ari menua tu dituntung pengelekai igi penyakit nya ba bulan Februari taun 2020.
Sebedau tu, penyampau kes ninting hari ti pemadu tinggi bisi dirikodka ba bulan Januari 2021, iya nya 5,725 kes.
Tuai Direktor Opis Menteri Pengerai, Tan Sri Dr Noor Hisham Abdullah madah, Selangor mengkang ngerikodka kes berampit ti pemadu tinggi, iya nya 2,251 kes.
Tu ditangkanka enggau Johor (699 kes), Kuala Lumpur (660 kes), Kedah (445 kes) enggau Kelantan (441 kes).
“Semua nengeri ngerikodka penambah kes sehari tu. Nengeri ti ngerikodka kes positif COVID-19 ti pemadu mimit iya nya Perlis, iya nya enam kes, sereta Putrajaya (semilan),” ku Dr Noor Hisham.
Zon gadung nadai agi di Semenanjung Malaysia sepengudah empat nengeri, iya nya, Pulau Pinang, Selangor, Wilayah Persekutuan Kuala Lumpur enggau Putrajaya sereta Melaka nyadi zon mirah kena Hari Dua.
Di Sarawak, bisi lima pelilih menua agi dalam kategori gadung iya nya Simunjan, Asajaya, Kabong, Marudi enggau Telang Usan.
Kepala Menteri Sarawak, Datuk Patinggi Abang Johari Tun Openg, minta semua bala tuai raban bansa enggau tuai rumah ngembuan disiplin ti tinggi.
Tuai raban bansa enggau tuai rumah patut ngemeranka pengelikun enggau pengerai nembiak redak sida, kelebih agi maya napi penusah ketegal pengelekai igi penyakit COVID-19 ti majak nambah maya kediatu.
“Aku minta sukung bala tuai raban bansa enggau tuai rumah bejalaika SOP lebuh maya Gawai ila, ngambika penyakit tu enda ngelekai lebuh kitai berami Gawai,” ku Abang Johari.
Sebedau tu mega, Komiti Mutarka Penusah Ngenyit udah mutuska Hari Raya Aidil Fitri semina ulih dirami sehari aja kena nyaga pengelikun mensia mayuh.
