KUALA RAJANG: Rang Undang-Undang (RUU) Ubah Artikel 16 Perlembagaan Sarawak ngemeratka ngagai anak Sarawak empu megai nengeri tu.
Ngambi ripot ari UKAS, ku Menteri Muda Pemansang Mengeri, Pengatur Tanah enggau Rampa Menua, Datu Len Talif Salleh, pekara nya bebida enggau pengawa penyakal ti nulak RUU nya ketegal bisi juluk deka ngemendar peranak luar nyadi chalun enggau bediri minta pilih ba Pengawa Bepilih Negeri (PRN) ditu.
“ Renggat umur ke tau ngerejista enggau ngundi udah diinsur ari 21 taun ngagai 18 taun pengudah ubah RUU nya,” ku iya nerang.
Berebak enggau nya, iya ngansak rayat ba sitak Kerubong nentuka Perintah Gabungan Parti Sarawak (GPS) menang maya PRN ti deka datai kena nentuka perambu pemansang ba sitak nya ulih diteruska.
Datu Len Talif Salleh ke mega Kaban Kunsil Negeri (ADUN) Kuala Rajang nya madah, pengawa ngaga jalai ari Kerubong ke Sare udah dipesetuju Kepala Menteri, Datuk Patinggi Abang Johari Tun Openg maya bejadika ‘Program Belia Tiang Seri Negara’ maya Hari Minggu, kemari.
Penembu jalai tu ila deka ngemuntangka pejalai peranak ba kandang menua nya.
