PUTRAJAYA: Perintah udah ngemendarka Palan Nyeridi Anak Mit (TASKA) beoperasyen baru maya Atur Nagang Pemindah Belebas (PKPB) tu dikena ngemudahka apai indai ti deka nurun gawa semanjai timpuh nya.
Ngambi ripot ari Berita Harian, Menteri Pemansang Orang Indu, Ruang Bilik enggau Mensia Mayuh, Datuk Seri Rina Harun madahka, pengatur TASKA mesti minta pemendar ngagai Opis Pengintu Pengelantang Raban Bansa (JKM) negeri sebedau muka nya baru.
“Kitai nerima mayuh ripot ari apai indai ti deka nurun gawa enggau kitai mesti mutarka isu tu enggau lengkas. Kitai nemu tajapan PKPB tang aktiviti ekonomi agi patut dipejalaika.
TASKA mesti ngasika SOP ke terit nyengkaum nakahka timpuh nganjung entara sesiku nembiak ke bukai kena nentuka pengerai enggau pengelikun sida dijaga.
Nangkan ka nya, Rina madahka SOP ti silik sentang pengawa muka TASKA maya PKPB tu udah diserah ngagai Opis Pengelikun Menua (MKN) ngambika ditesau ngagai mensia mayuh.
Ku iya, tebal agi TASKA ke dibuka maya PKPB tu dikena nyaga nembiak mit ngambika ulih nulung apai indai ti gawa ba sektor peribit ketegal bisi entara sida agi patut ke opis.
