Kuching, 19 Ogos : Sapit Premier Sarawak, Datuk Amar Awang Tengah Ali Hasan betemu enggau Menteri Besai, Datuk Seri Ismail Sabri Yaakob bagi berundingka senentang projek besai ke deka diatur Sarawak enggau menua serantau.
Nengah siti penerang media, Awang Tengah madahka penemuai Perdana Putra nya dikena meri licha ngagai Menteri Besai bekaul enggau pengawa dagang di ASEAN dalam sukut kuasa ke ulih dikemaru.
“Entara pekara ti dikerandau iya nya tanggung pengawa Sarawak ungkup komitmen ngagai Malaysia dalam Sempekat Grid Kuasa Asean ti disain ba taun 2007.
“Pengawa betemu tu mega dikena mantaika projek ti dipelin Sarawak dalam sektor kuasa begulai enggau menua ASEAN baka Singapura enggau Indonesia,” ku iya.
Ke mega ngulu deligit Awang Tengah ngagai Putrajaya iya nya Sapit Menteri Kuasa enggau Pengelikun Rampa Menua, Dr Hazland Hipni, Tuai Pegawai Eksekutif Raban Sarawak Energy, Datu Sharbini Suhaili enggau Direktor Unit Perancang Ekonomi Sarawak, Datu Dr Mohammed Abdullah Zaidel.
Nangkan ke nya Awang Tengah madahka Sarawak minta sukung Menteri Besai dalam mai projek nya ngambika diperunding ti ngaul Perintah Besai enggau Indonesia sereta Singapura.
