KUCHING , 19 Ogos 2022 : Pengajar di nengeri tu diperansang chakah agi bejalaika tangkup pengawa dalam ngemeratka ulah integriti enda ngira penatai asal diri, pengarap, ideologi sereta bida politik.
Premier Sarawak, Datuk Patinggi Tan Sri Abang Johari Tun Openg madahka, pelajar iya nya pugu pemansang penau penemu ungkup siku-siku orang ti mungkur mayuh macham budaya enggau sigi patut dipenggi semua orang.
“Pekara tu beguna laban pengelantang enggau penyerakup rayat Sarawak ti datai ari pupu raban bansa mesti terus dijaga. Penyerakup enggau pengelantang ti tegap deka nentuka semua pemar ulih sama ditapi sereta ulih ditempuh. Polisi Transformasyen Pemansang Sarawak deka ulih dipejalaika enggau mujur sereta lanchar,” ku iya lebuh bejadika pengerami Hari Pengajar ti ke-15 renggat nengeri Sarawak.
Ku Abang Johari madah, tetiap iku pengajar mesti terus bebendar nambahka tikas profesionalisme diri nengah chara ngambi bagi ba dalam latih bagi nambahka penemu ke diatur perintah.
Tebal agi latih ke ulih nambahka kualiti sekula, pengawa ngajar enggau belajar enggau pemujur nembiak awakka modal mensia ti ditempa mungkur semua pekara sereta bisi daya napi pemar revolusyen industri 4.0 tauka IR4.0.
Nangkan ke nya, iya nerangka perintah Sarawak terus nyukung agenda pelajar menua ti mantu ngangkatka tikas pelajar di Sarawak bediri sama tinggi enggau agenda pelajar di renggat menua ungkup pemaik anak Sarawak.
