KOTA SAMARAHAN, 15 Julai; Kereban perubat ti direjister ba baruh Opis Bekuasa Kereban Perubat (MDA) ditukuka selamat diguna ungkup mensia mayuh.
Berindik ari nya, Sapit Menteri Pengerai Mensia Mayuh, Pengawa Berumah enggau Kaunsil Kandang Menua II Sarawak, Micheal Tiang Ming meransang mensia mayuh milih kereban perubat MDA dikena nyamin pengelikun enggau pengasi kereban nya.
Nya kebuah, iya minta semua ejensi nyengkaum ejensi perintah, ejensi peribit, kompeni bekait enggau perintah (GLC), palan pelajar tinggi sama nyukung pengawa ti dipejalaika MDA.
Ku iya madah, MDA iya nya orang ti nyadi tulang belakang dalam mantu bejalaika pengawa pansik teknikal sebedau meri pemendar ngagai produk nya.
Entara produk perubat tu iya nya kit peresa pengerai, sengkabung mua enggau ppe ti endang ditemu selamat.
Ku iya nerang, kereban perubat tu ngembuan mayuh macham bansa produk ti ulih diguna ngubat enggau ‘diagnosis’ penyakit.
Iya mansutka jaku nya rambau pengerami bejadika Program Jelajak Peranti Perubatan Fasa Endemik ke diatur MDA di Auditorium Pusat Jantung Negara, Kota Samarahan, lebuh Hari Lima.
