MARUDI, 29 Jun: Penyampau 1,500 iku rayat ke mendam di Pasar Long Lama, ba pelilih Marudi deka ngasaika bungkur jalai alun ke lebih manah sereta selamat enda lama agi.
Tu berindik ari pengawa ngemanahka tikas jalai alun ti nyengkaum parit enggau entali ai di kandang endur nya nyau deka tembu digaga.
Kaunsil Pemansang Koridor Kandang Menua (RECODA) madahka, majoriti peranak Kayan ke diau ba dia deka ngasaika pemanah berindik ari jalai pemanjai 0.5km nya ti disikap parit enggau entali ai, endur ngengkah kerita ba pasar tebing sungai Baram iya nya 140km ari mengeri Miri.
“Projek nya dipejalaika Ejensi Pemansang Tanah Tinggi (HDA) ba baruh RECODA,” ku RECODA madah ba dalam siti penerang lebuh Hari Tiga.
Iya madahka, projek nya dipejalaika ejensi pemansang tanah tinggi (hda) ba baruh RECODA ti nyerangkung ngangkatmanah tikas dua jalai ulu enggau ngaga dua kutak engkelebat semin sereta atas entali ai.
Berebak ari nya recoda deka terus ngemansangka long lamma ke endang tebilang enggau buah rian, ikan sungai sereta pemanah rampa menua di endur nya ulih matak penatai temuai sereta nyungkak ekonomi rayat di pelilih nya.//
Ku RECODA madah, Long Lama deka terus disambung ke jalai besai nengah projek mega tauka projek besai ke udah diperambu perintah Sarawak.
“Tu nyerangkung Long Atip, Long Bedian enggau genturung pendiau bukai ke semak dia,” ku iya madah agi.
Kelimpah ari nya, projek jalai alun Miri-Marudi, Marudi-Mulu enggau Long Panai-Long Lama ti udah dilanggur mega deka dipejalaika RECODA.
Projek jalai ti sepemanjai 147km nya mungkur jalai sambung ti udah kelalu lama dirandaka rayat ke diau di ulu Baram.
