KUCHING, 24 Jun: Adat ‘Ngiling Tikai’ iya nya siti pengerami dikena nutup Pengerami Hari Gawai Dayak ulih nyadi pelasar dikena ngerapitka agi kaul penyerakup pupu bansa di nengeri tu.
Ku Datuk Bandar Kuching Utara, Datu Junaidi Reduan madah, pengelikun enggau pengelantang ke diasai rayat diatu berekat ari kerejasama sereta kaul ti manah entara semua etnik.
“ Nya kebuah, ukai semina ba bansa Iban aja tang mega semua pupu bansa mesti ngetanka adat tu.
“Ari dulu suba, kerejasama enggau kaul penyerakup pupu bansa di Sarawak ngasuh nengeri bukai tauka menua luar ngining meda laban Sarawak entara nengeri ti tegap dalam ngetanka penyerakup,” ku iya.
Iya mansutka jaku nya rambau Pengerami Ngiling Tidai ke diatur Dewan Bandaraya Kuching Utara ( DBKU) lebuh Hari Empat.
Ku iya nerang, baka pengerami bukai ti diintu rayat Malaysia, Hari Gawai Dayak mega beguna laban nya mandangka identiti komuniti Dayak.
Berindik ari nya, pengerami ngiling tikai iya nya siti chunto ke pemadu manah dikena ngerapitka agi penyerakup.
Nangkanka nya, ku Tuai Gawai DBKU Durie Austine madahka, pengerami ngiling tikai’ tu nyadika peluang dikena begempuru seraya negutka kaul pangan diri lebih agi ba endur gawa pengudah dua taun menua napi pandemik Covid-19.
“Tuju pengerami tu diatur iya nya dikena nempa kerejasama enggau toleransi ba raban kitai ti mayuh pupu bansa seraya ngerapitka agi kaul kitai ba endur gawa,”ku iya.
Nya alai pengerami ngiling tikai DBKU tu endang setipak bendar enggau rambai jaku ‘Segulai Sejalai’ ti mai tuju idup begulai manah dalam siti perabung.-TVS
