KUCHING, 23 Jun: Marik empang tradisional enggau moden mujur dibai enggau dipandangka ba dalam program Every Woman Expo ti diatur ba Palan Konvensyen enggau Pemandang Perth, Australia.
Ku pedagang chap Marik by Entayang, Debbie Entayang Ridi madah, iya chukup temegah ati laban komiti pengatur program milih iya ngambi bagi ba dalam program fesyen ti mantaika marik empang ke digaga iya empu.
“Komiti pengatur Every Woman Expo bisi betelefon minta aku ngambi bagi ba dalam program pemandang tu.
“Beduduk ari nya, bisi lapan iti marik empang ke digaga aku dikena model ba dalam program pemandang fesyen ti nyadi siti pelantar dikena mantaika marik empang kitai Iban di mata dunya,” ku iya madah.
Debbie ke udah mendam di Australia kenyau ari taun 2000 madahka, program Every Woman Expo diatur ninting taun ti ngaul pekara dagang, pengerai, gaya pengidup, fesyen, asil kraf jari enggau pekara ke bukai.
“Aku endang ngembuan pengerindu ngaga kraf jari lebih agi marik empang kenyau ari mit pengudah suah meda ini enggau ibu aku begagaka jagan, chapan, beranyam, betenun sereta nusuk manik.
“Tetiap kali bisi kemisi sekula, lebuh pulai ke rumah panjai aku sigi minta sida ngajar aku ngaga kraf jari,” ku iya madah ngagai pengarang berita TVS apin lama ke udah.
Kelimpah ari nya, pengudah nelebaka diri ba pengawa dagang iya madahka diri seruran ngiga chara enggau peluang ti bisi disediaka dikena bedajaka produk Marik by Entayang ngagai tikas ke lebih tinggi.
“Ba penemu aku, sekumbang ke udah bedagang di menua Australia, peranak ba ditu endang rindu meda enggau meli produk ke digaga bansa kitai Iban laban ngembuan pemanah enggau penyelai ke jarang ditemu sida.
“Aku arapka produk ke digaga aku empu enggau pedagang bansa kitai ulih ngerembai ngagai menua bukai seraya nambahka kreativiti enggau kualiti awakka setanding enggau produk di menua bukai,” ku Debbie madah agi.
Sebedau tu, Debbie kala ngambi ba dalam program pemandang ti diatur Kraftangan Malaysia, Borneo International Beads Conference 2019, Pasar Seni Mit Kuching, sereta sekeda program ke diatur ba Semenanjung Malaysia, Singapura, Brunei enggau di Australia.
Iya mega kala dikangau ngajar, bekunsika penemu sereta pengelandik ba dalam woksyop negapka pengawa orang indu.
