KUCHING, 22 Jun: Raban nembiak Dayak diperansang temegah ati mai seni enggau main asal ke renggat dunya.
Tu ngambika seni enggau main asal Dayak ukai semina dikemeranka aja tang mega ulih dikunsika enggau dikerembaika ke menua luar.
Ambika chunto, pekit keling enggau kumang, betaboh, ngajat enggau main asal ke bukai awakka ulih ditemu sereta dipelajar bansa bukai di serata dunya.
Ku siku pemekit ti ngarika borneo ba pekit Miss Petite Global International 2022, Arshela Abdullah madah, seni enggau main asal dayak endang mayuh penyelai enggau pemanah ti endang dikerinduka mensia mayuh, lebih agi pengemeran seni enggau main asal di renggat entarabansa.
“Main asal tu nyadi lebih besai ba mata dunya. Laban mesti orang ba luar mayuh enda nemu senentang Iban, Bidayuh. Ukai semina ngaul Iban aka sereta program baka tu endang patut diteruska,”
Beduduk ari nya, Arshela arapka apai indai enggau raban nembiak rebak baru terus nyukung program ti mantaika seni enggau main asal awakka seruran diterima, dikerindu, dikemeranka sereta dikerembaika nyentuk ke jemah ila.
‘Nyadi aku arapka bala nembiak enggau apai indai terus nyukung pekit enggau program ti mantaika seni, adat enggau main asal bansa Dayak.
“Pemanah tu ukai semina ungkup kitai di Sarawak enggau Malaysia tang mega ulih dibai ngagai tikas entarabansa,” ku iya madah lebuh dirandau pengarang berita TVS pengudah nyadi siku ari akim ba pekit Little Kumang and Keling 2022 ti diatur ba CityONE Megamall apin lama ke udah.
Nangkan ke nya, Kumang Gawai Serian 2022, Melanie Joyce madahka, tetiap iku peranak Sarawak mesti bejalaika tangkup pengawa besaup bekunsika enggau ngerembaika seni enggau main asal ke renggat dunya.
“Nengah media rama kitai ulih bedajaka seni, adat enggau main asal rayat di menua kitai, lebih agi di Sabah enggau Sarawak laban kitai ba ditu mayuh bansa ti nyerangkung Iban, Bidayuh, Cina, Melanau enggau ke bukai.
“Nengah tu kitai ulih terus mantaika enggau bedajaka main asal rayat pupu bansa di menua tu,” ku iya madah.
Melanie arapka, raban nembiak di Sarawak semampai ngingatka adat enggau main asal bansa diri taja pan gawa sereta nampung pelajar di menua luar.
Tu siti chara dikena nentuka pemanah seni, adat enggau main asal terus ditanka enggau dikemeranka. – TVS
