KUCHING, 19 Jun: Pemansang di kandang menua ulu enggau menua pesisir mesti deka dikerembaika agi awakka setipak enggau pemansang di mengeri.
Tu berindik ari perintah udah ngemendarka agih belanja ke besai dikena ngemansangka nengeri tu.
Kaban Kaunsil Tinggi (MT) Sayap Bumiputera (PBB) ke baru, ti mega Sapit Menteri di Opis Premier (Pekara Korporat, Pemadah enggau Unit Komunikasi Awam Sarawak) Datuk Abdullah Saidol madahka, mayuh ari sitak Kunsil Nengeri (DUN) di Sarawak datai ari menua pesisir ke mesti diberi perati.
Tu dikena nentuka rayat ke mendam di kandang menua nya enda tinggal ari ngasaika pemansang ti dibai perintah.
“Ba penemu aku pekara tu adil ungkup kandang endur dua pertiga ari 82 DUN ti ngarika endur Bumiputera ke ngaul mayuh macham etnik mesti diberi perati awakka pemansang dipejalaika mungkur serata nengeri ke ukai semina mekuhka pemansang di mengeri aja,”
Abdullah ke mega Kaban Kunsil Nengeri (ADUN) Semop nerangka, rayat di menua pesisir mega udah chukup mayuh mantu perintah ngemansangka nengeri kenyau ari kelia, tebal agi nyerahka tanah ti dikemansangka nyadi ladang enggau projek pemansang ke bukai.
“‘Nyadi endang patut peranak di menua pesisir diberi perati baka sida ke mendam di mengeri.
“Laban asil ari kebun enggau ladang, ari pengawa nebang kayu balak ke suba datai ari menua pesisir enggau asil nya ti dikena ngemansangka mengeri awakka ngelantangka rayat sereta aku pechaya kandang endur di mengeri mega deka terus dikemansangka,” ku iya madah agi.
Iya mansutka jaku nya rambau aum pengarang berita beserimbai enggau Gempuru Besai PBB Ke-15 lebuh Hari Minggu.
